ህዝቢ ኣብ ልዕሊ ህዝቢ ክዘምት ዝግበር ዘሎ ዳግማይ ሽርሒ ክፈሽል ይግባእ!
ካብ ተስፋ ንሰላም ዝተዋህበ መግለጺ
ዕለት 23 መጋቢት 2016 ዓ.ም
ቀዳማይ ሚኒስተር ኣብይ ኣሕመድ ናብ ስልጣን ካብ ዝመፅእ ንዳሓር ኣብ ኢትዮጵያ ብኣሽሓት ዝቁፀሩ ጎንፅታት ተፈጢሮም እዮም። ኣብ ሰሜናዊ ክፋል ሃገርናን ኣብ ክልል ኦሮሚያን ከቢድ ህልቂት ዘስዐቡ ኲናት ተኻይዶምን ይካየዱን ኣለዉ። ኣብቲ ቅድሚ ሓደ ዓመት ብስምምዕ ሰላም ፕሪቶርያ ደው ዝበለ ክልላት ኣምሓራን ዓፋርን ሓዊሱ ብቐንዱ ኣብ ትግራይ ብዝተኻየደ ኲናት ኣብ ታሪኽ ሃገርና ተራእዩ ብዘይፈልጥ መልክዑ ልዕሊ 1 ሚልዮን ዜጋታት ከም ዝሞቱን ልዕሊ 4 ሚልዮን ዝኾኑ ድማ ካብ መንበሪኦም ከም ዝተመዛበሉን ይግመት።
እዞም ውግኣት ብቐንዱ ኣብ መንጎ መንግስትን ተቓወምቲ ፖለቲካዊ ሓይልታትን ዝካየዱ እካ እንተኾኑ ካብ ዝሓለፈ ታሪኽና ብዝተፈለየ መንገዲ ግን እቶም ጎንፅታት ኣብ መንጎ ህዝቢ ንህዝቢ ዝኾኑሉ ኣጋጣሚታት ተራእዩ እዩ። ብፍላይ ኣብ ትግራይ ኣብ ዝተኻየደ ኲናት ንዘበናት ብሰላማዊ ጉርብትናን ሕውነትን ተኣሳሲሮም ይነብሩ ዝነበሩ ህዝብታት ኣምሓራን ትግራይን ሰለባ እቲ ጎንፂ ኾይኖም። ቐንዲ ምኽንያት ምስረታ ዉዳበ ተስፋ ንሰላም እዚ ኩነታት እዚ ዝፈጠሮ ዓብይ ስግኣት እዩ።
ተስፋ ንሰላም እዞም ነዊሕ ግዘ ዘቑፀረ ናይ ሓባር ታሪኽ፣ ባህሊ፣ ስነ-ልቦናን መንነትን ዝካፈሉ ህዝብታት ኣብ መንጎኦም ዝኾነ ይኹን ዓይነት ጎንፅን ፍልልይን እንተሃለወ እኳ ዳግማይ ናብ ውግእ ክኣትውን ደም ክፋሰሱን ኣይግባእን ዝብል ፅኑዕ እምነት ብምሓዝ ኣብ መንጎ ክልቲኦም ህዝብታት ዘሎ ሰላማዊ ርክብ ንምጥንኻር ዓሊሙ ዝተመስረተ እዩ።
ምፍራም ስምምዕ ሰላም ፕሪቶሪያ ምስ ብዙሕ ጉድለታቱ እንተኾነ እውን ውግእ ደው ካብ ምባል ሓሊፉ ንምስኻዕ ዕላማ ውዳበና እውን ፅቡቅ ዕድል ክፈጥር ከም ዝኽእል ብምሕሳብ ደጊፍናዮ ኢና፡፡ኣብ ክልላት ኣምሓራን ኦሮምያን ተመሳሳሊ ስምምዕ ሰላም ተፈሪሙ አብ ዉሽጠን ዝካየድ ዘሎ ኩናት ደው ክብል እዩ ዝብል ትፅቢት እውን ነይሩና። ይኹን እምበር ተጀሚሩ ዘሎ ሰላም ክጠናኸርን ክሰፍሕን እዩ ኢልና ተስፋ ኣብ ዝገበርናሉ ኣብዚ ሐዚ ግዘ ህዝቢ ትግራይን ኣምሓራን ናብ ዝላዓለ ህልቂት ዘእቱ ደበና ኲናት የንፀላሉ ክምዘሎ ንዕዘብ ኣለና ፡፡
ቅድሚ ሐዚ እውን እንተኾነ እቲ ኣዕናዊ ኲናት ዝተጀመረ ድሕሪ ናይ ቃላት ጦርነት እዩ፣ ኣብዚ ቀረባ ግዜ ዝወፁ ዘለዉ ሃይለ ቃል ዝተመልኦም መግለፅታት እውን ካሊእ ከቢድ ህልቂት ኣብ ቅድሜና ከም ዝተሃቀነ ዘመላኽት ስግኣት ፈጢሩልና ኣሎ፡፡ ከም እምነት ውዳበና ይትረፍ ካልኣይ ዙር ኲናት ምውላዕ እቲ ናይ ዝሓለፈ ኲናት እውን ትርጉም ኣልባን መሰረታዊ ጥፍኣት ዘስዓበን ታሪኻዊ ስሕተት እዩ፡፡ ኲናት እቲ ገዛኢ ሓይሊ ስልጣኑ ንምንዋሕ ዝጥቀመሉ ኣማራፂ እምበር ናይ ህዝብታት ረብሓን ድሌትን ዘየማልእ ብምኻኑ እዚ ምዕራፍ እዚ ክዕፆ ይግባእ፡፡ ስለዝኾነ ህዝብና፦
ቀዳማይ፦ ኣብ ሰሜናዊ ክፋል እታ ሃገር ዝርከቡ ህዝብታት ነንሕድሕዶም እናዋግኡ ብምድኻም ዕድመ ስልጣን ምንዋሕ ቀንዲ ዕላማ እዚ ስርዓት ምዃኑ፤
ካልኣይ፦ ኣብ ቀረባ ግዘ ዝተፈጠረ ልውውጥ ሃይለ-ቃል ድሌታት እቲ ስርዓት ንምዕዋት ኮነ ኢልካ ዝተፈጠረ ውዲት ምዃኑ፤
ሳልሳይ፦ ካብ ሕሉፍ ጌጋታት ብዘይምምሃር ኣብ መፃወድያ ውዲት እቲ ስርዓት ብምውዳቅ ንዳግማይ ኲናት ምልዕዓል ካሊእ ታሪኻዊ ስሕተት ከም ዝኸውን፤
ራብዓይ፦ ድሕሪ ሐዚ ካልእ ንክልቲኡ ህዝብታት ዘሳትፍ ኲናት ዝገደደ ህልቂት ከስዕብ ጥራይ ዘይኮነስ ንመላእ ሃገርን ህላወ ህዝብን ኣብ ሓደጋ ዘእቱ ምዃኑ፤
ሓምሻይ፦ ኣብ መንጎ ክልቲኡ ህዝብታት ዘሎ ዘይምርድዳእ ብሰለማዊ፣ ሕጋውን ዴሞክራስያውን መንገዲ ካብ ምፍታሕ ወፃኢ ብኲናት ዘላቒ መፍትሒ ክመፅእ ከምዘይኽእል ብምግንዛብ ነቲ በቲ ስርዓት ተወጢኑ ዘሎ ኲናት ናይ ምልዕዓል ውዲት ብብቕዓት ከፍሽሎ ይግባእ።
ንክልቲኡ ህዝብታት ንውክል ኢና እትብሉ ፖለቲካዊ ሓይልታት፣ ጋዜጠኛታት፣ ነጠፍቲ ማሕበራዊ ሚዲያን ካልኦት ፅዕንቶ ፈጠርቲ ኣካላትን ንህዝባዊ ረብሓን ደሕንነትን ተገደስቲ እንተኾይንኩም፡ ኣብ ክንዲ ግዳይ ሽርሒ እቲ ስርዓት ብምዃን ኲናት ምልዕዓል ኣብ መንጎ ክልቲኡ ህዝብታት ዝነበረ ሰለማዊ ዝምድና ናብ ንቡሩ ንምምላስ በርቲዕኹም ክትሰርሑ ይግባእ ኢልና ንኣምን፣ ብጥብቂ እውን ነዘኻኽር። ብዝኾነ ይኹን ዕላማ ሓደ ህዝቢ ኣንፃር ካሊእ ህዝቢ ንክዘምት ምልዕዓል ፀረ-ህዝብነተ እምበር ሓልዮት ክኸውን ኣይኽእልን። ድሌት ህዝቢ ዘላቒ ዝኾነ ሰላም፣ ዴሞክራስን ልምዓትን እምበር ጎንፅን ኲናትን ኣይኮነን።
ስለዝኾነ ድማ ስምምዕ ሰላም ፕሪቶሪያ ዘለውዎ ጉድለታት ብምምላእ ዘላቒ ፍታሕ ብዘምፅእ መንገዲ ክጠናኸር ይግባእ እምበር እቲ ስምምዕ ኣፍሪስካ ናብ ካሊእ ኣዕናዊ ኲናት ምእታው ግቡእ ኣይከውንን። ልዕሊ ማንም ወናኒ እዛ ሃገር ዝኾነ ህዝቢ “ካብ ሕዚ ኲናት ይኣክል!” ብምባል ናይዚ ስርዓት ሽርሕን ውዲትን ንከፍሽል ተስፋ ንስላም ፃዊዒታ ተቕርብ፡፡
ተስፋ ንሰላም፣ ሰሜን አሜሪካ
ሰላም ንህልውናና!
Twitter page: https://Twitter.com/Hope4Peace2023
Facebook page: https://Facebook.com/Hope4Peace2023